حقها!!!
مساء الخير.
مساء النور.
أية ده؟!!!
أية؟
مفهمتش؟!!!
أية اللى مفهمتوش؟
يعنى أية "حقها"؟ هى دى خناقة
عائلية؟ عشان أسيبكم وأروح!!!
أه, أصلها ضربته فى التقاطع, وهوه شد شعرها.
وبعدين؟
راحوا القسم وعملوا محاضر عشان كل واحد ياخد
حقه بالقانون.
على كدة هيكملوا شهر العسل فى محكمة الأسرة؟
ميهمناش.
يعنى أية؟!!!
مش ده موضوعنا.
أمال أية الحكاية؟!!!
أصل مبلولى بيقول العيش بيتكلف على الحكومة
كثير, وهى ما عدتش قادرة تحتمل تدفع الدعم له.
هوه الرغيف بيتكلف كام؟
يتكلف حوالى 60 قرش.
وبيخدوه بتوع الدعم بكام؟
بخمسة وعشرون قرش.
والحكومة بتتحمل الفرق؟
أه.
بصراحة ده كثير, وهى مظلومه فعلاً من الناس
فى الحتة دى, وإحنا ما نرضاش لها الظلم.
يعنى أية؟!!!
يعنى حقها تشيل الدعم من على الرغيف, وتكسب
كمان شوية فوق التكلفة.
ياراجل؟!!!
حقها؟ ولا مش حقها؟
بصراحة حقها.
كويس أنك أعترفت بكدة.
يعنى أية؟
يعنى إحنا كدة ظالمينها وهى لازم تاخد حقها.
تمام.
بس تدينا كمان حقنا.
أزاى؟!!!
يعنى أنا بأروح أرخص عربيتى كل سنة, وبأدفع
خمسة ألاف ترخيص, وزيهم مخالفات.
معقولة بتدفع 10000 جنية كل سنة فى ترخيص
العربية.
تخيل؟
وبما إن الرخصة بتتكلف أقل من 200 جنية
"شاملة تكلفة التأمين الأجبارى", يعنى لو عملوها بـ250 جنية يبقوا
كسبانين فيها.
عندك حق, وأنا موافقك فى دى كمان
"المفروض يخلوها بـ250 جنية بس".
وشهادة الوفاة بتدفع لها 350 جنية, ده غير
ما حولها فى حين إن تكلفتها لن تتعدى الخمسة جنية.
فعلاً, وأنا موافق يخلوا ثمنها 10 جنية. مهم
المفروض برضة يكسبوا.
أه, وإحنا مش عايزين نبص فى
"حقها" لحسن يتنظر.
عندك حق.
وشهادة الميلاد بتسقط صلاحيتها كل كام شهر,
,أنا مش فاهم ليه السبب مع إن بيانات الناس طول عمرهم ما بتتغيرش من ميلادهم حتى
وفاتهم.
والسجل التجارى لازم تجدده كل ثلاثة شهور
"حتى وإن لم تتغير أية بيانات فيه".
وكل الخدمات بندفع ثمنها أضعاف مضاعفة, وما
بنتكلمش. يبقى الأحسن يرفعوا الدعم خالص اللى "كل شوية بيعايرونا وذالينا به",
وبعدها كل واحد ياخد حقه.
عندك حق.
عموماً, وإحنا مالنا.
فعلاً عندك حق "الموضوع ما
يخصناش".
عموماً, دع شعب سيكو سيكو يعيش فى سلام,
مادام راضى بحاله.
فعلاً لحسن يفتكرونا "لا سمح
الله" بنتكلم على حد ثانى.
لا, "الحقيقة", إحنا بنتكلم على
هناك, "الصراحة حلوة".
يله, تصبح على خير.
وأنت من أهله.
,,,,,,,,,,,,,,,,,,,,,,,,,,,,,,
وهنا صمت هتموت عن الكلام.
,,,,,,,,,,,,,,,,,,,,,,
https://x.com/AlMayadeenNews/status/2059725109766640024
https://x.com/AJArabic/status/2068161427735556372
https://x.com/TalatWbas/status/1949268602776871049
https://x.com/Meemmag/status/1963342485440155862
https://x.com/thaeralbannaa/status/1963320048811995321
بقلم
هتموت من الشمس
المشاركات
ليست هناك تعليقات:
إرسال تعليق