البست جنب الجامع!!!
مساء الخير.
مساء النور.
أية ده؟!!!
أية؟
مفهمتش؟!!!
أية اللى مفهمتوش؟
أية "البست جنب الجامع"؟!!!
يعنى فى ريحة.
ما فهمنا الزفت جنب الجامع, "يعنى فى
ريحة". بس هوه أية "البست"؟!!!
مكان العرض اللى بيتوسط القاعة فى الملهى
الليلى, وبتطلع عليه الرقاصة "لتقوم بمهمتها الفنية النبيلة".
الله ينور عليك, أهو كدة نورتنى.
الحمد لله إنك تنورت. أول ما جت سيرة
الطاهرة.
إشرح لنا بقى أية سبب المشكلة؟!!!
مفهمتش؟!!!
أية اللى لم الشامى على المغربى؟!!!
برضة مفهمتش؟!!!
أية اللى جاب الملهى جنب الجامع؟!!!
أه ه ه ه ه, تقصد أية اللى قربهم لبعض.
أه.
لا, ده أنت فاهم الموضوع غلط.
طب, فهمنى أنت بالراحة.
الجامع بصحنة وقبته ومنبره ومأذنته,,,,,إلخ
أه, يعنى تقصد جامع كامل ومتكامل.
أه, وكبير معمول فى وسط كبارية سياحى لزق فى
البست!!!
أستنى عشان عايز أستوعب اللى أنت بتقوله:
"يعنى الرقاصة بترقص فى ريح الجامع".
بالظبط, خد بقى راحتك ووقتك وإستوعب.
تمام.
أستوعبت؟
لا, بس أحكى وفهمنى اللى أنت بتقوله؟!!!
عايز تفهم أية؟
يعنى أية الجامع وسط الكبارية؟!!!
يعنى مفيش حيطان تفصل ما بينهم؟!!!
بص, من الأول, وبراحة فهمنى أية أصل الحكاية
عشان أفهم.
للأسف هناك بعض المصريين "من ضحلى
الثقافة", بيتاجروا فى كل شىء.
أه, ده عارفينه.
وتلاقى ناس مغتصبة أرض, وعايزة تثبت لها
وجود عليها, فأول شىء تبنى عليها جامع.
إلا يستحى؟!!! وهل هذا يجوز؟!!!
طبعاً لا. "الله طيب لا يحب إلا
الطيب", وبالتالى لا يجوز أن تبنى "بيت لله" على أرض مسروقة, أو
مغتصبة, أو على الأقل "لا تملكها", أو بأموال مسروقة, وبعدين هتقول أية
لربنا لما تروح له؟
طيب, إستهدى بالله, وبراحة ومن الأول,
وأحكى.
ماشى, أنت عارف إن طبيعه شغلى "كخبير"
هى التنقل بين المناطق السياحية لتقييم المنشأت, والعقارات, والمصانع, وخلافة,
لصالح البنوك, ومؤسسات الدولة, والقطاع الخاص.
وفى اليوم ده أنا كنت مكلف من رجلين أعمال
بتقييم مجموعة من أملاكهم "منشئات متعددة وقرية سياحية وكمبوندات ومنشأت
سكنية وتجارية متعددة" فى مدينة سياحية مشهورة. من أجل الدمج بينهما, ثم
تحويلها لشركة واحدة تطرح فى البورصة.
تمام, كمل.
ومن ضمن الحاجات اللى هالتنى لما شفت المشهد
ده داحل قرية صغيرة سياحية على أرض الدولة, ومؤجرة من الدولة له "لعمل السفارى"
عليها, وفى محيطها.
يعنى أية "سفارى"؟!!!
دى كلمة "سفر" بالعربية بس بعد ما
تعوجها شوية عشان تعرف تنصب بها على الأجانب.
ليه؟
عشان تشتغلهم وتاخد فلوسهم.
أزاى؟!!!
إسئل أى سائح: "يعنى أية سفارى"؟
هوه تلاقيه عرق وريل, وهيبدء يسرد لك الكثير
من الخرافات, والخزعبلات, وإنها تعنى المغامرات, وركوب الأهوال, وصعود الجبال, ونزول
الوديان, وركوب البيتش بجى, والجمال,,,,, إلخ
بدأت أفهم.
استنى عشان أنا هفهمك واحدة واحدة.
ماشى, كمل..
المهم, واحد من "رجال الأعمال"
كان مؤجر قطعة صحراوية على أطراف المدينة "بعقد يجدد سنوى".
وعمل فيها شوية منشئات سريعة, ومعمولة
بطريقة رخيصة.
ليه؟
عشان لو أنهو عقدة ورحل لا يحدث له فيها أى
خسائر كبيرة.
أية نوع منشئاتها؟
تبدء من ناحية الطريق بسور طويل من مخلفات
الأشجار, والأخشاب, والنخيل, تتوسطه بوابة معمولة بنفس الطريق.
وأية شكل المبانى من الداخل؟
بنفس الشكل البسيط ولكن على ناحيتين على حرف
إل . ناحية منهم مطبخ بسيط وقاعة طعام "أوبن بوفية" مبانيها بالطوب المشطب,
وأسقف من الألوح المضلعة, والناحية الثانية صفه من 6 محلات بازار وسفونير,,,,, إلخ
أشرح لى من أول ما هتخش من البوابة هتشوف
أية؟
أول ما تخش من البوابة هتشوف المحلات
والمبانى عاملين على هيئة سبعة مفتوحة من النص ووسطها البست, وكله مفتوح.
يعنى المكان كله مفتوح, والبست عبارة عن
منصة خشبية مرتفعة شوية عن الأرض على هيئة دائرة كبيرة يحيط بها قاعدة عربى من
الشلت, ومعرشة ببرجولا خشبية كبيرة دائرية, ولزق فى البست بدون حواجز أو عوازل أو أسوار,
أو إحم, أو دستور, جامع ضخم خرسانى متكامل. وخلف الجامع ورشة مفتوحة للبيتش باجى,
ومكان مفتوح لوقوف الجمال وأصحابها.
وأية
شكل البرنامج؟
أنا محضرتوش, ولكن وأنا بأعين, وأصور
المكان, لاحظت فيه مجموعه من السياح كانوا راجعين من رحلة البيتش باجى.
تفتكر أية اللى بيحصل؟
بياخدوا السياح لفتين بالبيتش باجى, ثم
يرجعوا يرتاحوا وياكلوا ويتسوقوا من المحلات, ثم يختموها برؤية الرقاصة حتى يختم
السفارى.
أه, اللى من غير ما يشوفها الخواجة مش هيحسب
له سفارى.
بس الغريب إن لم أستطع أن أنسى الجامع اللى
صليت به هناك "أبداً".
شكله عمل حساب للرقاصة والفرقة, عشان بعد ما
تخلص ممكن تلحق الفجر.
ما تهزرش, عشان الموضوع كارثة.
أه, مهو أنت متعرفش الناس عندنا ممكن تعمل
أية من أجل المال؟!!!
ياريت, يكون ربنا يرحمنا.
بس أنت قيمت الجامع أزاى؟!!!
لنا طرقنا فى ذلك, ولكنه ليس موضوعنا, لأنى
بعد ما سافرت ولفيت وشفت وعاينت كله, وبدأت الشغل. أختلفنا "ورفضت
الشغل" بالرغم من إن الأعتاب كانت مغرية جداً, وبشكل غير عادى.
يله, تصبح على خير.
وأنت من أهله.
,,,,,,,,,,,,,,,,,,,,,,,,,,,,,,
وهنا صمت هتموت عن الكلام.
,,,,,,,,,,,,,,,,,,,,,,
https://x.com/AlMayadeenNews/status/2059725109766640024
https://x.com/AJArabic/status/2068161427735556372
https://x.com/TalatWbas/status/1949268602776871049
https://x.com/Meemmag/status/1963342485440155862
https://x.com/thaeralbannaa/status/1963320048811995321
بقلم
هتموت من الشمس
ليست هناك تعليقات:
إرسال تعليق