مش فاهم إيه يوم 6 ابريل اللى واجعين دماغنا بيه ده؟

الموضوع: مش فاهم إيه يوم 6 ابريل اللى واجعين دماغنا بيه ده؟؟
مش فاهم إيه يوم 6 ابريل اللى واجعين دماغنا بيه ده؟؟

دا يوم ليه مناسبه خاصه و قررنا إننا نعمل فيه حدث احتجاجى للضغط من اجل المطالبه بتعديل الدستور و الغاء قانون الطوارىء واقرار قانون مباشرة الحقوق السياسيه لضمان انتخابات نزيهه




**طيب و انا مالى و مال تعديل الدستور والانتخابات و قانون الطوارىء؟؟
إزاى
إحنا طالبين تعديلات فى الدستور تسمح بترشح الشخصيات المحترمه لرئاسة الجمهوريه
وكمان انتخابات نزيهه و اشراف قضائى
يعنى يبق عندك رئيس جمهوريه انت اللى تجيبه و انت اللى تحاسبه وانت اللى تشيله لو مش عاجبك.. وكمان يبقى كبيره فترتين ما يقعدش على قلبنا طول عمره
يعنى التعديلات الدستوريه و نزاهة الانتخابات هى الحياه المحترمه اللى بنتمناها
هاتقول ماليش دعوه و عايز امشى جنب الحيط.. خليك ماشى جنب الحيط بس ده مش هايمنع ظباط الشرطه يقبضوا عليك بدون سبب علشان عندهم قانون الطوارىء




**طيب احنا ممكان نعمل إيه علشان نقدر نعدل الدستور و نضمن انتخابات نزيهه؟؟

ممكن نعمل كتير
نبدا ضغط كبير و نحاول نجمع اكبر قدر ممكن من الناس تقول نفس الكلام.. ويكونوا مقتنعين بالمطالب و بإمكانية تحقيقها
تعديل الدستور و انتخابات نزيهه و الغاء الطوارىء




**وإشمعنى يوم 6 ابريل يعنى؟؟؟

علشان اليوم ده بيحمل ذكرى عظيمه للشباب المصرى
وكان اول يوم الشباب يتجمع على فكره واحده و يصر على تنفيذها و ينشرها بكل قوه بكل الوسائل المبتكره
والكلام ده كان فى 6 ابريل 2008 وكانت الدعوه لإضراب عام فى مصر كلها ..وحصل ضجه كبيره و وضع النظام بكل اجهزته فى رعب حقيقى




**يعنى تفتكر لو عملنا حاجه فى يوم 6 ابريل .. فيه حاجه هاتتغير؟؟

احنا كان لينا تجربه فى 2005 فى حركة شباب من اجل التغيير
كان وقتها الضغط مستمر لتعديل الدستور .. من النخبه و الشباب والشخصيات العامه
وحاول الحزب الوطنى المناوره بإقرار تعديلات مشوهه للدستور.. منها الماده 67

احنا مقتنعين اننا لسه لغاية دلوقتى ما عملناش الضغط الكافى لتعديل الدستور و تمهيد الطريق و عمل انتخابات نزيهه

والضغط الحقيقى مش هايتم بين يوم و ليله... دا مشوار طويل وصعب جدا
بس لازم نحشد و نوعى الناس بصوره مستمره
والضغط المؤثر هايكون فى الشارع مش على الفيسبوك .. الفيسبوك ما هو الا وسيله للحشد والتواصل

ولازم الناس تنفض للخوف و يعرفوا ان الطريق طويل و محتاج جهود متراكمه




**يعنى يوم 6 ابريل بقى خلاص هانحرر مصر؟؟

لأ طبعا
دى مجرد خطوه فى مشوار
والوسائل متعدده
لكن الاحتجاج السلمى حاجه مهمه جدا

واحنا فى لحظه مهمه فى تاريخ مصر
لأول مره يحصل اتفاق للمعارضه على فكره واحده
تغيير الدستور و اصلاح لطريق و انتخابات نزيهه

يبقى نستنى ايه
وامتى هنطالب بحقوقنا





**طيب أنا المفروض اعمل ايه اساسا فى يوم 6 ابريل؟؟؟

الأول تعرف تعمل إيه قبل يوم 6 ابريل
مطلوب منك سواء هاتقدر تنزل اليوم او مش هاتنزل إنك تنشره بكل قوتك فى كل مكان
ولنشر الفكره صور كتير
ممكن تبعت رسايل موبايل لكل صحابك
ممكن تغير صورة البروفايل بتاعك لأى بانر لليوم
ابعت ايميلات بالدعوه لكل القوايم والمجموعات البريديه اللى عندك
ادخل على المنتديات و اكتب موضوع بالدعوه دى
اعمل تعليقات على المواقع الاخباريه

ممكن تاخد الموضوع اللى مكتوب ده او تكتب اى صيغه تناسبك

لو عايز صيغه تبعتها فى رسايل موبايل اكتب

شارك فى مسيره سلميه من ميدان التحرير حتى مجلس الشعب.الثلاثاء 6 ابريل 2010 الاعه 12 ظهرا للمطالبه بتعديل الدستور و الغاء قانون الطوارىء ونزاهة الانتخابات


المهم تنشر بقوه و بكثافه
وحاول تقنع صحابك اللى متابعين التطورات الاخيره و ممكن يكونوا متعاطفين


يوم 6 ابريل نفسه بقى

هانتجمع فى الميدان نفسه الساعه 12 بالظبط
وهنلاقى ناس لابسين آى دى لجنة النظام
هانتقسم مجموعات صغيره
كل مجموعه 4 افراد
هانمشى بنظام على الرصيف فى شارع القصر العينى لغاية مبنى البرلمان

مسيره سلميه جدا ومتحضره

ولما نوصل مبنى البرلمان نطلب مطالبنا المشروعه

الغاء قانون الطوارىء
تعديل الماده 67 و 77 و 88
تعديل قانون مباشرة الحقوق السياسيه




**وافرض منعونا؟؟


احنا قدمنا اخطار رسمى لمدير أمن القاهرة برقم 2636 لسنة 2010 وقت المظاهرة : الثانية عشر ظهرا ، يوم الثلاثاء 6ابريل 2010. خط سير المظاهرة : من ميدان التحرير ، وصولا إلى مجلس الشعب ، عبر شارع القصر العيني. إعمالا لنص القانون رقم 14 لسنة 1923 الذي يوجب فقط إخطار أجهزة الأمن بمكان وموعد المسيرة قبلها بثلاثة أيام على الأقل


و إعمالا للقانون وللمادة 54 من الدستور المصري التي تنص على :

” للمواطنين حق الاجتماع الخاص في هدوء غير حاملين سلاحاً و دون حاجة إلي إخطار سابق ولا يجوز لرجال الأمن حضور اجتماعاتهم الخاصة و الاجتماعات العامة و المواكب ، و التجمعات مباحة في حدود القانون”.

واحنا اكثر حرصا من الاجهزه الامنيه على بلدنا وعلى سلمية التعبير عن الرأى

وكمان هايكون معانا نواب مجلس الشعب و عدد كبير من الشخصيات العامه و اعضاء الجمعيه الوطنيه للتغيير




**طيب لو انا من خارج القاهره.. اعمل ايه؟؟؟

معلش استحمل شويه و ضحى و تعالى القاهره
وفيه وقفه اخرى فى محطة مصر فى الاسكندريه فى نفس الوقت




**طيب افرض قبضوا على ناس لإرهاب الباقى؟؟
مفيش حجة لمنع اليوم
إخطار للداخليه كما ن القانون
واليوم سلمى جدا و ليه مسئولين ولجنة نظام وهما هايحددوا أى بدايل مطروحه
ممنوع تعطيل المرور
وفيه عشرات من نواب مجلس الشعب و الشخصيات العامه و مجموعات من مختلف القوى السياسيه

وعموما لو حسيت بأى قلق

تابع مع غرفة العمليات

0112955963

0194818582

0172152808




للمزيد من المعلومات


الجروب الرئيسى على الفيسبوك
http://www.facebook.com/group.php?gid=9973986703


الموقع الرسمى لشباب 6 ابريل
http://www.facebook.com/l/38aef;http://www.facebook.com/l/5e140;6april.org



المجموعه البريديه لشباب 6 ابريل نرجوا الاشتراك الآن
http://www.facebook.com/l/38aef;http://www.facebook.com/l/5e140;groups.yahoo.com/group/shabab6april/


مدونة شباب 6 ابريل
http://www.facebook.com/l/38aef;http://www.facebook.com/l/5e140;shabab6april.wordpress.com


خدمة تويتر لشباب 6 ابريل
اشترك على تويتر و اعمل تتبع لشباب 6 ابريل
وتوصلك اخبارنا على طول
http://www.facebook.com/l/38aef;http://www.facebook.com/l/5e140;twitter.com/shabab6april

الايميل الرسمى للحركه
shabab6april.mov@gmail.com

جروب الحركه باللغه الانجليزيه
shabab 6 april youth movement … in English

http://www.facebook.com/group.php?gid=38588398289




0102864919

0110479445