هوه سكان إيجيبت دول جنسيتهم أية؟!!!
https://x.com/TalatWbas/status/1949268602776871049
https://x.com/Hamedalalinew/status/1949501449903153209
https://x.com/athmane_dza/status/1949591264602501367
هوه سكان إيجيبت دول جنسيتهم أية؟!!!
بـستغرب قوى كل ما أقابل سكان "إيجيبت" فى مصر, ومعدتش فاهم لهم, همه أصلاً جنسيتهم أية؟!!!
شوية تلاقيهم بيتكلموا أنجليزى "لبلب" بس مع لكنة أمريكية,
وشوية تلاقيهم بيتكلموا أنجليزى "لبلب" بس مع لكنة بريطانية, وشوية
تلاقيهم بيتكلموا أنجليزى "لبلب" بس مع لكنة مصرية, وشوية تلاقيهم بيتكلموا
أنجليزى متطعم بعربى وكأنه "فرانكو أربك", وشوية تلاقيهم بيتكلموا
أنجليزى "لبلب" بس مع لكنة ضايعة, ولا تعرف هى أمريكية, ولا بريطانية,
ولا فيومية!!!
بصراحة أنا إحترت فيهم!!!
هى أية الحكاية؟!!!
تعرفوا أنا بعد رجوعى من أوروبا صدمت من الثقافة السائدة فى مصر, وطريقة
الناس فى التعامل وفى الكلام, فيه حاجات كثير تأخرت كثيراً!!!
وهأحكى لكم عدة قصص تبين لكم وتشرح جوهر اللى عايز أقوله!!!
أنا كنت عايش فى أوروبا لفترة طويلة "حوالى 16 سنة", وعدت
بعدها لمصر فى أجازة طويلة, لأنى كان من أخر مرة بقى لى 10 سنين لم أزور مصر, وكنت
بأخذ أجازاتى وقتها داخل أوروبا.
يعنى فى أجازاتى هناك "أزور دولة أخرى فى أوروبا".
المهم بعد ستة أيام من رجوعى مصر. دخل أخى للمستشفى, وأكتشفنا وجود
سرطان عنده, وأضطريت أن ألغى رجوعى لأوروبا لألازمة فى مرضه, وتداعت بعدها
الأحداث!!!
المهم أنى لما عدت, فوجئت بالتغيير الكبير فى ثقافة المصريين!!!
وكان بيزورنى من حين لأخر أصدقائى اللى مازالوا قاطنين فى أوروبا كل
ما يزوروا مصر.
ولفت نظرى سؤال وجهه لى صديق منهم "أول ما نزلت مصر",
"وكان يعرف أنى مشفتش مصر من فترة طويلة", قال لى: أية رأيك فى مصر؟!!!
بصراحة السؤال أستفزينى, فرددت: وكأنها تأخرت 10 سنين!!!
فرد: لا, هى أتأخرت فى الـ 10 سنين "عشرين سنة"!!!
فصدقته على ما قال, وسكت حزيناً!!!
فعلاً لقد صدق. مصر بترجع للوراء كل سنة سنتين!!!
وبترجع دى عشان تفهمها كويس. أقصد "بتتراجع وتتخلف وتتأخر
وبتتدهور"!!!
"يعنى ماشية بظهرها" زى ما الدنيا عامله معنا, حاول بقى
تفهم!!!
ما علينا, مش عارف أوصف لك شعورى كان أية لما صدمت من اللى حصل لبلدى,
وعلى فكرة ده السبب اللى دفعنى لأحتراف الكتابة "بعد ما كنت فقط هاوى", وأنضمامى
بعدها لكل صوت بيعلى "مطالب بالتغيير"!!!
بصراحة, زعلت قوى على بلدى, وعلى اللى حصل لها, وصعبت على, وصعب على أهلها,
إحنا ما يصحش يحصل لنا كدة!!!
وأنفجرت, قلبى لم يعد يحتمل, وأصبح الموت والحياة بالنسبة لى
"متساويين", وأنضممت لكل صوت ثائر, وتقدمت فى كل مظاهرة تدعو للتغيير,
كم حملت من مصابين, وكم أصبت, وكم أختنقت من الغاز, وكم مر الرصاص من حولى, وكم
جوعت, وكم جلست على الأرصفة, ولكنى لم أتخلى يوماً عن حلم الثورة, وصدقونى مهما
كانت الصعوبات, ومهما طال الزمن فنحن بأذن الله عائدون, ثقة فى الله "نحن
عائدون"!!!
مع إن معظم الثوار دخلوا السجن, أو قتلوا, أو رحلوا للخارج, ولكنى
بقيت!!!
تحملت الكثير من السباب, والسفاهة, والغتاتة, والغلاسة, والمضايقات,
وقطع الأرزاق, ولكنى برضة بقيت, لقد أخذت قرارى "لن أرحل أبداً". سأغرس
أرجلى فى وحل بلدى, وسيلطخ به بدنى, ولكنى لن أرحل, وليكن ما يكون!!!
واليوم مازلت أقف حتى الآن مرفوع الرأس, وإن كان فى العمر بقيه,
فسأقص عليكم بقية القصة فى يوم أخر, بعد أن "تهدم الأسوار", "كما
هدمت أسوار برلين", وكما سقطت "أسوار الباستيل"!!!
ولنعود لقصة "إيجيبت"!!!
المهم, بعد فترة تلقيت رسالة من واحدة مصرية, مرسلة لى على
"الفيس بوك" بالأنجليزية تسألنى عن رأيى المهنى فى مشكلة رطوبة فى حيطان
شقتها!!!
وأستغربت كثيراً فأنا كاتب فى التعريف, "مهندس استشارى, وخبير تقييم
عقارى وصناعى وخبير مثمن", ولم أكتب "مبيض محارة"!!!
فرددت عليها بالعربى: "معلشى أصل أنا ثقافتى هولندية, فلو تعيدى
صياغتها بالهولندى أكون شاكر"!!!
فردت على بالعربى: "وأنا بأعرف فرنساوى, تحب أبعتها
بالفرنساوى"!!!
وسكت, بس بعدها ألح على سؤال: "هى عرفت منين أنى ما بعرفش
فرنساوى"؟!!!
غريبة, مع أنى بأتكلم خمسة لغات, يمكن خمنت وأصابت, ويمكن لأ!!!
طبعاً مش محتاجة تخمين "هى عرفت حكاية أنى بأعرف انجليزى منين",
يمكن عرفت عشان أنا كاتب أسمى على الفيس بالأنجليزية "مع أنى عملتها كدة لاأرادى",
بس كبر دماغك, وما تخدش فى بالك!!!
المهم, بعد فترة, من كثرة المصريين اللى بيحاولوا يكلمونى بالأنجليزى,
وأنا بأرد عليهم بالعربى "مع أنى أعرف أنجليزى أحسن منهم" لغاية لما
تعبت وزهقت!!!
أية ده؟ هوه الخطأ فى, ولا فيهم؟!!!
ولا الخطأ فى التربية الخطأ, والثقافة الضحلة؟!!!
ما تعتزوا شوية ببلادكم, وتحترموا هويتكم, وتتكلموا عربى!!!
أية اللى حصل فى الدنيا يا ناس, ده لغتنا أحسن لغة, وهى أم اللغات,
ويكفى أنها "لغة القرآن".
وهنا صمت هتموت عن الكلام.
,,,,,,,,,,,,,,,,,,,,,
https://x.com/TalatWbas/status/1949268602776871049
https://x.com/Hamedalalinew/status/1949501449903153209
https://x.com/athmane_dza/status/1949591264602501367
بقلم
هتموت من الشمس
المشاركات
ليست هناك تعليقات:
إرسال تعليق