لمن يهمه الأمر؟!!!

 

https://x.com/wctm5_/status/1908368968403796152

اللى تستغرب له إن بعد سنين طويله من العمل الشاق عندى فى غسيل الهدوم, وكانت مثال للعامل المثالى, ومخليانى ماشى أتخايل بهدومى اللى زى الفل, ولا فيها بقعة كدة ولا أى شىء متسخ, وعندما طردتها من الخدمة وطلقتها بالثلاثة عشان فقط إحتاجت علاج بأقل من 1000 جنية, عمرك شفت جحود بالشكل ده, بالرغم اللى كانت محتاجاه مش كثير بالنسبة لأسعار الزمن الحالى!!!

بصراحة أنا كنت جاحد للخدمة الجليله اللى كانت بتأديها لى فى صمت "كانت فانية نفسها فى خدمتى", وبالرغم من ذلك لم يشفع لها إنى كنت بأتركها تعمل لوحدها وأروح أنام, وكانت تخلص وتطفى فى صمت, ولا تسألنى أى شكر أو زيادة أجرة أو علاوة!!!

وطردتها شر طرده بدون ما أعمل حساب للعشرة الطويلة الطيبة وحسن المعامله!!!

اللى عمرها ما أشتكت, وكانت فانية نفسها فى تنظيف هدومى فى صمت, ولما طردتها معملتش لى محضر تعدى فى القسم لإثبات الحالة, ولا طالبتنى حتى بنفقه متعه ولا إعاله, ولا قالت عنى: "ده خدنى لحم ورمانى عظم", ولا جرجرتنى فى المحاكم, وخلت اللى ما يشترى يتفرج على, ولا خلت الربع منى بقرشين!!!

بصراحه كانت أفضل مثال على حسن العشرة وحسن الجوار, وكانت فعلاً أصيله وبنت أصول, ورحلت فى صمت وتركتنى أعانى مع الجديدة عشان أعرف قيمتها وبأنى كنت جاحد لخدماتها الجليلةً, تركتنى وتركت ورائها ذكريات ولا أروع كلها نظافة وسعادة وهناء, ووبصراحة أنى بأعترف بجدارتها وإنها بتغسل أنظف وأحسن من أى واحدة جديدة, وإنها جميلة جداً ومن الزمن الجميل!!!

ودائماً سأذكرك للأبد بالخير!!!

معذرة للتأبين السابق لغسالتى العزيزة التى رحلت فى صمت وتركتنى أعانى مع الجديدة التى لاتعمل بنفس كفائة القديمة ولا تعمل بدون كل شوية ما تتوقف وتشتكى, وماتجرؤش تتركها بمفردها, لأن لو سبتها فهى لن تسيبك, وهتنادى عليك, وهتقلق منامك لمجرد أن تركتها لوحدها ربع ساعة "عامله زى جيل اليومين دول", فهى لا تستطيع العمل لوحدها فى صمت, لأنها بحاجة دائماً لتتدخل لها فيما تعمل لتعدل تصرفتها, بصراحة علمتنى الأدب, وخلتنى أترحم على القديمة التى قليلاً ما أشتكت, ولو سألتونى لقلت لكم أنها المفروض تاخد أوسكر, لأنها كانت أصيلة وبنت أصول, حقيقى القديمة تحلى ولو كانت وحله!!!

 

https://x.com/wctm5_/status/1908368968403796152

بقلم

هتموت من الشمس